Jólasveinninn kemur í kvöld

Mikið er ég nú heppin að eiga svona frábærar vinkonur sem hafa svona mikla trú á mér  Ástarþakkir fyrir allar hvatningarkveðjurnar sem ég fékk í síðasta bloggi, I love you girls.... Ég fór sem sagt í þetta atvinnuviðtal en svo var þetta nú ekkert tengt einhverri ákveðinni vinnu. Þetta var bara viðtal við tengiliðinn minn hjá þessari ráðningastofu svo hann fengi meiri upplýsingar um mig... svo skrifaði ég undir samning og tók stafsetningarpróf. Þetta gekk allt saman mjög vel og ég var bara nokkuð góð með mig þegar ég gekk út einum og hálfum tíma seinna. Svo á ég bara að fylgjast með atvinnuauglýsingunum á vefnum hjá þessari stofu og senda tengiliðnum mínum tölvupóst ef ég sé eitthvað áhugavert. Ég er búin að senda honum tvo pósta síðan og er aðeins bjartsýnni á að ég fari nú að fá einhverja vinnu hér. Það er bara ekkert grín að leita sér að vinnu í útlöndum, því miður. Ég er nú reyndar líka búin að senda tvær umsóknir til EFTA í Brussel og örfáar til Íslands líka, svona smá tilbreyting frá því að gera danskar umsóknir.

Valur Snær er búinn að vera að læra um Maya indjánana í Guatemala alla vikuna, svaka spennandi verkefni. Hann er búinn að elda mat frá Guatemala... sem hann sagði að líktist tröllahorinu sem ég kaupi stundum... grunar að hann sé að meina Guacamole. Þau eru búin að horfa á stuttmynd um indjánafjölskyldu, föndra landslagið á svæðinu, teikna fána og búa til "Bekymringsdukke" sem myndi sennilega útleggjast sem "áhyggjudúkka" á íslensku. Þetta eru svona pínulitlar indjánadúkkur sem á að setja undir koddann sinn ásamt bréfi sem maður skrifar áhyggjur sínar í. Hann var svo góður að lána mér dúkkuna sína undir koddann minn, kvöldið fyrir atvinnuviðtalið... og ég er ekki frá því að þetta hafi hjálpað  Mæli með svona þemaviku í íslenska skóla.

Í kvöld kemur jólasveinninn frá Grænlandi og kveikir jólaljósin á Strikinu og allar búðir verða opnar til miðnættis. Við erum því að spá í að skella okkur í bæinn og kaupa smá jólagjafir og afmælisgjöf fyrir Sindra sæta sem heldur afmælisveislu á sunnudaginn. Það verður æðislegt að hitta dönsku fjölskylduna okkar. Það er búið að vera svo mikið að gera síðustu vikur hjá öllum í skólanum að maður er komin með fráhvarfseinkenni af að hitta fólk.

Ritgerðin gengur líka ágætlega þó mér sé ekki alveg að takast að skila henni fyrir mánaðarmót eins og ég ætlaði mér... tafðist aðeins við þessi atvinnumál svo það eru enn eftir nokkrir dagar af ritgerðarvinnu. Í dag ætla ég að reyna að skrifa eins mikið og ég mögulega get... sem er samt svolítið erfitt því ég er að drepast í öxlinni  Ég hélt nefnilega á Tinna í gær þegar hann sá hund... og fékk þennan líka rokna löðrung á kjálkann frá honum... með allar neglur úti. Þetta voru ekki stór klór en tvær neglur fóru á kaf inn í húðina á mér og það blæddi töluvert úr þessu. Ég þurfti því að fara á læknavaktina í gærkvöldi og fá stífkrampasprautu í öxlina og vaknaði svo í morgun með öxlina tvöfalda og helauma.... skemmtilegt!

Athugasemdir

[Anna Kristín vinkona (IP-tala skráð) 30.11.2007 kl. 10:46]

hæ elsku vinkona

gott að þér gekk vel á ráðningarskrifstofunni, þú færð vinnu áður en langt um líður þú ert svo dugleg og klár! Vá en spennandi vika hjá Vali Snær.. mjög sniðugt..

Gangi þér vel að skrifa í dag.. og góða skemmtun á Strikinu í kvöld.

knús á línuna anna kristín

[Ásta Björk (IP-tala skráð) 30.11.2007 kl. 14:07]

Hrós til þín :) nú fer e-ð að gerast er þaggi

Mætumst kannski á röltinu í miðbænum kvöld eða já allavega í afmæli á sunnudaginn

Algerlega kominn tími á hitting usssssuss

seeja Ásta Björk

[Alda (IP-tala skráð) 30.11.2007 kl. 19:51]

Góða skemmtun í kvöld sæta :)

kveðja Alda Frænka:)

[Anna Sig., 30.11.2007 kl. 23:21]

Dísús.. eins gott að kötturinn klóraði þig ekki kvöldið fyrir viðtalið.. hefði kannski verið pínkuneyðarlegt að mæta með sár og plástra í framan!!

[Rósa (bjalla) (IP-tala skráð) 9.12.2007 kl. 17:18]

Gangi þér sem best á lokasprettinum Eydís mín!  Gaman að skoða myndirnar:-)) Hafið það sem best. P.S Þarf að rukka Kristínu um saumaklúbbspóstinn-

Kveðja

Rósa G

[Alda (IP-tala skráð) 10.12.2007 kl. 11:39]

Hæ skvísa bara aðeins að kíkka og kvitta sjáumst vonandi fljótega á nýju ári :)